Дар Донишгоҳи давлатии тиҷорати Тоҷикистон 3-юми июни соли равон Маросими ифтитоҳи курсҳои омӯзишии забони англисӣ ва пешхизматӣ барои омода намудани пешхизматҳои тарабхонаву ошхонаҳои шаҳри Душанбе баргузор гардид.
Чорабиниро ректори донишгоҳ Қурбонзода Маҳмадалӣ Раҳмат бо сухани ифтитоҳӣ оғоз намуда, доир ба нақшаи чорабиниҳои донишгоҳӣ дар асоси “Стратегияи рушди сайёҳӣ дар Ҷумҳурии Тоҷикистон барои давраи то соли 2030”, омода намудани мутахассисон ва пешхизматҳои дараҷаи баланд бо донистани забони хориҷӣ, заминаи устувори моддӣ-техникӣ, парки технологӣ ва озмоишгоҳи замонавии донишгоҳ ибрози андеша намуд.
Сипас, муовини Раиси шаҳри Душанбе Муинзода Мавсума Муинӣ, муовини якуми Кумитаи рушди сайёҳии назди Ҳукумати Ҷумҳурии Тоҷикистон Ҳабибулло Амирбекзода, мудири шубаи рушди сайёҳии Мақомоти иҷроияи ҳокимияти давлатии шаҳри Душанбе Комрон Зафар ва мудири кафедраи экспертизаи молҳо, технология ва сервиси тарабхона, номзади илмҳои иқтисодӣ Хубони Сорбон доир ба масоили рушди сайёҳӣ дар Ҷумҳурии Тоҷикистон ва нақши курсҳои омӯзишӣ дар омода намудани кадрҳои баландтахассуси сайёҳӣ бо маърӯзаҳои пурмазмун суханронӣ намуданд. Пас аз анҷоми чорабинӣ меҳмонон аз пойгоҳи моддӣ – техникии донишгоҳ дидан намуда, аз хусуси ҷавобгӯ будани он ба талаботи замони муосир изҳори қаноатмандӣ намуданд.
Шуъбаи табъу нашр